حماده هلال: أنا بنى أدم عادي، يتعصب ويهدأ ويخطىء ويتوب ويرجع
بدأ حياته كمطرب الى أن بدأ يدخل مجال التمثيل فاقتنع به الناس كممثل،
ونضج فنيا ليصل بالمداح للجزء الرابع حماده هلال لم يعرف هل هو مطرب أم ممثل ويترك الحكم للجمهور!
أنا بنى أدم عادى يتعصب ويهدأ ويخطأ ويتوب ويرجع
لم نؤكد الجزء الخامس من المداح
عالم الجن حقيقى لكن احنا بنمثله بشكل درامى فيه فانتازيا
حوار – انتصار أحمد
فى رمضان القادم ستقدم المداح الجزء الخامس هل تعرف سينتهى المداح عند الجزء كام؟
إلى الأن لم نؤكد الجزء الخامس أنا أتمنى أعمل منه أجزاء كثيره
كمال أبو ريا بيعاتبك لأنك لم تتدخل فى استبعاده من الجزء الثالث؟
الأستاذ كمال بيعاتبنى لأ خالص الأستاذ كمال أخونا وهو فنان كبير والواحد يفرح إن يكون معاه نجم زى أستاذ كمال لو الناس تلاحظ هتلاقى حواديت كل أسطوره ليها نجوم تانيه جديده
يعنى نجوم الجزء الثانى غير نجوم الجزء الثالث غير نجوم الجزء الرابع..
الجزء الرابع ممكن نكون رجعنا مليكه تانى لأن الدراما سامحه بذلك إن كان وجود الأستاذ كمال أبو ريا فى جميع الأجزاء ده شرف ليا
وهو مكسب لأى حد فى العمل وأتمنى لكنها فى النهايه بترجع للكتابه والدراما
لكنك لو تدخلت مع المخرج فى إستكمال أو إنضمام فنان سيوافق لأنك بطل العمل؟
عمر ما كان بطل العمل يقدر يحدد مين يمثل ومين لأ العمل لو لم يكن له قائد كبير وهو المخرج يبقى عمل بعتبره عمل فاشل
أحمد سمير من المخرجين الكبار جدا فى الوطن العربى والمداح إتولد على إيديه فهو فاهم كل حاجه فى المداح أمين جمال من المؤلفين الكبار، وليد أبو المجد وشريف يسرى
هؤلاء المؤلفين اللى بنوا من عند ربنا المداح فلو أنا بطل مسلسل أنا لا أملك أنى أقول فلان يشارك أو لا.
أنا ممكن أرشح فلان أتوافق عليه تمام أنا رشحت ناس كتير وقريبين منى جدا لكن أستاذ أحمد سمير لم يراهم فى الدور فهذا موضوع مش صحيح
بالعكس كل مشاهدنا لم تكن رعب بالنسبه لنا كنا بناخد كل الأمور بخفة دم حتى الكواليس الناس رأتها كتير على السوشيال ميديا وكان واضح وظاهر.
هل بالفعل حدثت أحداث مريبه أثناء التصوير؟
لا ولا أى حاجه حصلت خالص الإشاعات اللى بتقول إن الناس حصل لها حاجه إحنا الحمد لله إشتغلنا أربع أجزاء فى أربع سنين والحمد لله كلنا كويسين وبخير ولم يحدث لنا أى شئ.
إبن حمادة هلال مثل معاه فى الجزء الرابع هل بترشح منك أم من المخرج؟
يوسف له علاقه كبيره بالأستاذ أحمد سمير وهو اللى قاله له أنا عاوز أمثل وأنا كنت معترض على هذه النقطه أنه يمثل لأن الدور أنا كنت بشفق على أى طفل يمثله ولما أستاذ أحمد رأى يوسف وأقتنع به قال لى أنا عاوزه فى الدور قلت خلاص مقدرش أقف ضده.
هل لك مرجعيه من أحد المعالجين بأمور الجن؟
أنا مرجعى الوحيد هو القرآن والسنه تانى حاجه
كل ما هو فى المخزون البصرى والمخزون السمعى انى بتفرج على فيديوهات مهمه لناس مهمه
وأشوف ايه اللى يعجبنى ويليق على الدراما وأنفذه لكنى لم أجلس مع ناس هى دى شغلتهم
بعد تجسيدك للمداح ودخولك عالم الجن هل تقتنع بكل الأحداث أم هى فى النهايه تمثيل لا يمت للواقع بصله؟
أه طبعا فى حاجات فى الواقع لكن احنا بنمثلها بشكل درامى
شكل فيه فنتازيا لأننا بنحاول نعمل الشكل البصرى بالجرافيك والإخراج وهو ده اللى بنعمله
بعد نجاحك فى التمثيل هل ترى نفسك ممثلا أكثر من مطرب؟
أنا لم أحدد لنفسى الناس هى اللى بتحدد ممكن أكون مركز فى التمثيل أكثر من الغنا لكن إن شاء الله نرجع نضبط الاتنين مع بعض.
من الصديق المقرب لك فى الوسط الفنى؟
كل واحد فى الوسط الفنى صديقى وأخويا وحبيبى ومش رد دبلوماسى حتى إسأليهم كلهم حبايبى وإخواتى.
حماده هلال معروف بأخلاقه وتدينه الم تغير الشهره شئ فيك؟
كل إنسان شايف نفسه كويس حتى لو بيعمل أخطاء كتير، والله أعلم الناس هى اللى تشوفها مش أنا إللى أشوفها فى نفسى
أنا بنى أدم عادى يتعصب ويهدأ ويخطأ ويرجع ويتوب ويخطأ تانى أنا عادى خالص.
الفنان حمادة هلال.. أنت تعتز بأنك من منطقه شعبيه هل مازلت تذهب إلى منطقتك وإلى أصدقائك القدامى؟
بحاول بقدر الإمكان إنى أذهب لأصحابى فى وقت الفراغ فى المنطقه اللى اتربيت معاهم فيها وأكلنا عيش وملح مع بعض
والناس اللى بتحب الواحد من قلبها وأنا بحبهم وأنا بفتخر انى من هذه المنطقه اللى هى القصيرين. الزاويه الحمراء أنا بفتخر بيها طبعا.
حدثنا عن علاقتك بجمهورك على السوشيال ميديا هل هناك تواصل معهم؟
بحاول أتواصل مع السوشيال ميديا بشكل يبقى لايق عليا والتواصل معاهم مش كتير،
الرسائل الخاصه أنا مش بعرف أروح لها خالص أخرى أعمل بوست كرياتيف وبطريقه مختلفه ودى أكثر حاجه بعملها.
هل هناك غيره من بعض الأشخاص داخل العمل؟
سؤال مستفز جدا ليه نغير من بعض ممكن إن الواحد عاوز يبقى كويس وناجح لكن مش غيره قاتله والحسد أعوذ بالله ملناش فيه.
الفنان حمادة هلال.. أحكى لنا عن تربيتك لأبنائك هل تربيهم مثل ماتربيت أنت أم تربيهم تربيه حديثه؟
أه طبعا طول الوقت الواحد بيحاول لأن الجيل الموجود دلوقتي غير جيل زمان غير الجيل اللى قبلنا
نحاول بقدر الأمكان اننا نتماشى معهم فى هذا العصر بالأصول والأخلاق ومعرفة ربنا سبحانه وتعالى ويعرف الصح والغلط وفى الأخر هو أدرى بنفسه.
هل يتدخل حمادة هلال فيما يشاهدونه أبنائه على السوشيال ميديا؟
أكيد فيه رقابه طبعا وأكيد مش عليا أنا بس أكيد على كل البيوت فى الوطن العربى
نصيحه تقدمها للأباء فى ظل الإنفتاح الذى نعيشه؟
أنصح بيها نفسى الأول يعنى حاول تصاحب أولادك يكونوا معاك تبقى ليهم صاحب وأخ وكل حاجه
وعندما يحسوا الأولاد أنك صاحب وصديق وبتنزل لهم بسنك تحت هتلاقى كل حاجه بتظهر ادامك وكل سنه وانتم طيبين
